ලංකාවේ ඡන්ද දායකයා කොයිබටද?

ලංකාවේ ඡන්ද දායකයා හැදින්විය හැකි මූලික ක්‍රම හතරක් මම හදුනාගත්තෙමි.

අංක 1 - රියැලිටි ෂෝ එකක එස් එම් එස් එකක් හා ඡන්දයක අතර වෙනස නොදන්නා මෝඩයෙකි.
අංක 2 - විකල්ප කියලා දෙයක් හිමි නැති නෝන්ජලයෙකි.
අංක 3 - කුමක් හෝ අධිකාරී බලයක් සොයමින් ලතැවෙන යටත් වැසියෙකි.
අංක 4 - කලින් කලට ලේ රස සොයනා මදුරුවෙකි.. 

අංක - 1 

ලංකාවේ ජනතාව ඡන්දය දෙන්නේ තරුවලටය. කොටින්ම කියනවානම් තාමත් මෙවර ජනාධිපතිවරණයට කුමක් වේදැයි කීමට අපි ඉක්මන් වැඩිය. එය තීරණය වන්නේ ජනාධිපතිවරණයට පෙර සතිය තුල අපේක්ෂකයන් සහ ඔවුන්ගේ සහචරයින් කරන ගොන් වැඩ අනුව වන බැවිනි. අපේක්ෂකයින් දෙදෙනාගෙන් තරුවක් වන්නේ කවුරුන්ද යන්න මත ඔහු ජනාධිපතිවරණය ජයගන්නවාද නැද්ද යන්න තීරණය වනු ඇත. රියැලිටි ෂෝ එකක ග්‍රෑන්ඩ් ෆිනාලේ එකක් නැරඹීමෙන් අපේක්ෂකයින් දෙදෙනාට ඒ පිලිඹදව තීරණයකට ඒමට හැකිවනු ඇත. ( කී වර්ඩ් - සිංහල, බෞද්ධ, කදුළු, බොක්ක, මුස්ලිම්, දෙමල, යුද්ධය, හදවත, ලේ, ආරක්ෂක හමුදා, මුස්ලිම් ත්‍රස්තවාදය, රැවුල )  අවසානයේ හදවත සසල කිරීමට සමත් අපේක්ෂකයා ජයගනු ඇත. 

අංක - 2

මහින්ද වෙනුවට රිප්ලේස්මන්ට් එක මෛත්‍රීය. බැසිල් වෙනුවට රනිල්ය ගෝඨාභය වෙනුවට රාජිත පැමිනෙනු ඇත. ඔවුන් මහින්ද රාජපක්ෂගේ පාලනයේ අවසාන අවුරුදු හයක ඉවසා දැන් කරලියට පැමිණ ඇත (ඒ ඇයි?). පාරිශුද්ධ චරිත දෙපැත්තේම නැත. ජනතාවට හොරකම් අඩුවෙන් කරන හොර කල්ලිය තෝරාගැනීම හැර වෙන විකල්පයක් නැත. මහින්දව ඉවත් කිරීමට මෛත්‍රීට ඡන්ද දෙන්නෝ එම පියවර අනුගමනය කරන්නේ ඒ විකල්ප හිගකම නිසාය. 

අංක - 3 

ඡන්දයට ඉදිරිපත් වන්නේ රැවුලෙකු, පර්සනැලිටි ඇත්තෙකු, තාත්තෙකු, කදුළු පිසින්නෙකු හෝ ගැලවුම්කරුවෙකු විනා ජනාධිපතිවරයෙකු නොවේ. ඒ අනුව රටේ ජනතාව නන්නත්තාර වී සිටින යන එන මං නැති අපත රැලකි. උන් ජීවත්ව සිටියදී සරත් ෆොන්සේකා යනුවෙන් හදුන්වන පුද්ගලයෙකි යුද්ධය මෙහෙයුවා උන්ට මතක නැත. දැන් එහෙම නමක් හමුදාවට සම්බන්ධ නැත. උන්ට මෙලෝ දෙයක් හිතාගත නොහැක. ලංකාවේ ජනාධිපති හා ඩේ කෙයාර් එකේ ටීචර් අතර ලොකු වෙනසක් නැති බව මේ අනුව ඔබට වැටහෙනු ඇත. හොරකම් කරන බව දැන දැනත් සමහර උන් පැවැත්ම උදෙසා ජනාධිපතිතුමාට කඩේ යයි. අපි වැඩකරන තැන ලොක්කා සමග ඇරගත්තොත් රැකියා සුරක්ෂිතභාවයට කෙලවේ. සරලව උන් කරන්නේ පැවැත්ම සාදාගැනීමය. ඒ හැරුණු කොට මහින්දට විතරක් හොදයි කීමට හේතුවක් නැත. 

අංක - 4 

ලංකාවේ ඡන්ද දායකයා යුද්ධයට හුරුවී ඇත. දීප්තිගේ තියරියට අනුව ඔවුන්ගේ පොදු සතුරා මියයාමෙන් පසු ඡන්ද දායකයා නන්නත්තාර වී ඇත. ඌ දැන් වෙන සතුරෙකු හොය හොයා ඇවිදී. සමහරුන්ට බොදු බල සේනා පිහිට ලැබෙන්නේ මේ අවස්ථාවේදීය. බොදු බල සේනා එකක් පමණි ඒ ඇරියස් එක පුරවාගැනීමට තවත් සංවිධාන ඇත.  

එම නිසා ඔබේ ඡන්දය ඔබට කැමති ගොන් විදිහකට පාවිච්චි කරන්න. 

එන්න ගොන්පාට් වෙන්න..

කළුතරට නුදුරුව කළුගල් මෝලකි. එය කොටුවේ වෙරල ගොඩ කිරීමට ගෙන එන කළුගල් නැවට පටවන ස්ථානයයි. රෑ ජාමේ පුරු එතැන් සිට කිලෝමීර පහක් පමණ ඈතින් සිටින අපට කළුගල් පටවන හඬ ඇසේ. ලඟ සිටින මිනිසුන්ට කුමක් සිතෙනවා ඇද්ද?

බම්බලපිටියේ සිට මතුගම බලා දිවෙන බසයකි. ඇඟිල්ලක් ගසන්නට ඉඩ නැත. රියදුරු තැන තවත් මගීන් 20 පමණ ගැනීමට රත්මලානේ නතර කරයි. 

පිටිදුවේ සිරිධම්ම හිමියන් සකෘදාගාමී හෝ අනාගාමී වී ඇත. තව නොබෝ දිනකින් එතුමා රහත් වනු ඇත. 

එක් මාධ්‍යයක් දුමින්ද සිල්වා වැරදියැයි කියයි. තවත් මාධ්‍යයක් වෙන එකක් කියයි. රජයේ මාධ්‍ය වෙනම කතාවක් කියයි.

සියළු රූපවාහිනි චැනලවල රාත්‍රි 8 පසූවීමෙන් පසු ප්‍රවෘත්ති රියැලිටි හා මෙගා ටෙලි විකාශය කරයි.. 

ඉහත පෙන්වාදුන් කාරණාවල පවතින සමානකම කුමක්දැයි විමසුවොත් දිය හැකි පිලිතුර වන්නේ අවස්ථා සියල්ලකදීම සමාජයේ ජීවත්වන මිනිසුන් බල්ලාට දමා ඇත කියාය. බස්රථයක ගියත් මේ යන්නේ මිනිසුන් යැයි හැඟීමක් නැත. බස් රථයේ යන මිනිසුන් ගෙදර ගිය පසු ඒ දෙයම තවත් මිනිස් කොට්ඨාශයකට සිදුකරයි. එයට විරුද්ධ වන්නා දෙස බලාගෙන අනෙක් මිනිසුන් දත නියවයි. මේ ලංකාවේ හැටිය. ලංකාවේ වෙසෙන්නන්ට අයිතිවාසිකම් නැත. එක්කෝ ඒවා උන් විසින් අහිමි කරගෙන ඇත. නැත්නම් කවුරුන්හෝ ඒවා අස්ථානගත කර ඇත.
ලියුම්කරු ලඟදී ගිය දේශනයක රසවත් කතාවක් ඇසුවේය. දකුණු ආසියානු රටවල් වල මිනිසුන් තරම් පද්ධතියට හුරුවූ මිනිසුන් කොහේවත් නැත. ඔහු එයට උදාහරණ කර පැවසුවේ ඇම්බියුලන්සයක් මගදී නැවතී එය පණගන්වන්නට එයට තල්ලු දමන රෝගියෙකි. එතරම්ම හෝ ඊට මදක් අඩුවෙන් අපි මේ පද්ධතියට හැඩ ගැසී අපව ගොන්පාට් කරන්නට ඉඩදී ඇත.
ලිපිය අවසාන කරමි. මෙහි අරමුණ පද්ධතිය වෙනස්කිරීමවත් හෝ අදාල සිද්ධි නැවැත්වීම නොවේ. මෙය ලියැවෙන්නේ ඒවා එසේ වෙන බව දැන දැන නොලියා සිටීමේ නොහැකියාව නිසාවෙනි...