ආදර මෙගා

පෙම්වතා පොහොසත් වන අතර පෙම්වතී දුප්පත්ය.
අනෙකේ පෙම්වතා දුප්පත් මුත් පෙම්වතී පොහොසත්ය.

එකල්හී පෙම්වතී පෙම්වතාගේ පියා යටතේ රැකියාව කරයි.
නැතහොත් පෙම්වතා පෙම්වතීගේ පියා යටතේ රැකියාව කරයි.


එමනිසා දෙමාපියන් කසාදයට අවුල්ය.
එමනිසා දෙමාපියන් . . . . පවසා ඵලක් නැත.

එකම යෝගට් කෝප්ප අච්චුවට වැලි පුරවා වැල්ලේ මාලිගා සාදා ඇථ. ක්ෂණයකින් ඒ මුහුදු රැල්ලෙන් සේදී යයි. පෙම්වතා හෝ පෙම්වතී ප්‍රතිවිරුද්ධ පාර්ශවයේ පවුලෙන් පැමිණෙන බාධක මැඩගෙන විවාහ ගිවිස ගත් පසු සභාතොමෝ සතුටින් විසිර යන අතර කතාවද අවසන්ය.

පෙම්වතිය හොටු නිළියකි. උදයට අවදි වනුයේ පෙර දින පෙම්වතා පැවසූ දෙයකට හොටු හලාගෙනය. ඉන්පසු රැකියාවට පිටවීමට පෙර පියා පැවසූ දෙයකට හොටු සලයි. ඉදින් රැකියාවට ගොස් ඒ අතරතුර එහි ඉන්නා උන් කරනා කෙනෙහිලිකම් වලට හොටු සලයි. අවසන හොඳම යෙහෙලිය හමුව උක්ත කාරණා සියල්ලම පවසා හොටු සලයි. අවසන සිනහවෙමින් රයිගම් ජනප්‍රිය නිළිය සම්මානය ගනියි.

පෙම්වතා එසේ නොවේ. බොහෝවිට ඔහු වීරයෙක් වන අතර කලාතුරකින් අහින්සකයෙකි.වීරයා හෝ අහින්සකයා හෝ මොකා වුව පෙම්වතා හරිම රෙස්පෙක්ට්ය. ගැහැණුන් ඔහු වෙත පැමිණ අඟර දඟර දමයි. ඔහු ගණනකට නොගනියි. සියල් සපිරි ලඳුන් පැමිණ අත ඇල්ලුවද ඔහු අත ගසා දමා අහක බලාගනියි. වීරයා නම් මෝටර් සයිකලයෙන් දෙවරක් යයි එයි. අහින්සකයා නම් ලාදුරු රෝගියෙකු සේ සියළු දුක් කම්කටොළු විඳගෙන සිටියි. කෙසේ හෝ කොපමණ ලඳුන් සිටියද පෙම්වතා පෙර සඳහන් කල හොටු ගැහැණිය පසුපසම යයි.

මෙගාව වගා කිරීමට නම් ජෝකර් කෙනෙක් අවැසිමය. පෙම්වතාගේ මාමා, පෙම්වතාගේ යහළුවෙක්, දුෂ්ඨයාගේ පියා, ගෙදරක වැඩ කාරයෙක් නැමැති ඕනෑම භූමිකාවක් තුලින් ඌ මතු කල හැකිය. නැතිනම් මෙගාව වගා කල නොහැක. නැතිනම් නාට්ටියම හොටු පමණකි.

පෙම්වතා හෝ පෙම්වතිගේ ආර්ථිකය මත දුෂ්ඨයා තීරණය වේ. එය ලස්සන මතද තීරණය විය හැක. දුෂ්ඨයා කවර ලිංගික වුවද ඇත්තේ දෙබිඩි ගතිය. පිරිමියා පිරිමියෙකු සේ හැසිරෙන අතර මායම් යොදයි, ඕපාදූප සොයයි, කේලම් කියයි. ගැහැණියද එසේමය; පිරිමි ගති ගුණයෙන් ආඩ්‍යය. ඒ හේ දුෂ්ඨයෙකු නිසාවෙනි.

අවශේෂව අම්මා, අප්පා, සහෝදර සහෝදරියන්ට සහ මෙහෙකරුවන්ට ලෝ බජට් නළු නිළි සෙට් එකක් යොදාගත් කල ටෙලිය සම්පූර්ණය. අධ්‍යක්ෂක සපයන්නේ විකාශය වන චැනලයෙනි. සංගීත වැඩ කටයුතු සඳහා අදාල චැනලයේ රියැලිටි වැඩසටහන් වලින් පිරිස් බලය ලබා දෙයි. පිටපත ලෙස මල් පොතක් හෝ සතියකට එපිසෝඩ් පහක් ලියන රැකියා විරහිත උපාධිදාරියෙක් සෙට් කරගත හැක.

ටෙලිය ගොඩය. තවම නැත. අනුග්‍රාහකයන් සොයා ගත යුතුය.
අනුග්‍රාහකයා බීම කොම්පැණි කාරයෙකු නම් ටෙලිය පුරාවට පෙම්වතී ඒ බීම බොයි.
අනුග්‍රාහකයා ශැම්පු කොම්පැණිකාරයෙකු නම් ටෙලිය පුරාවට පෙම්වතී ඒ ෂැම්පුම යොදා නායි.
අනුග්‍රාහකයා ෆෝන් කොම්පැණිකාරයෙකු නම් ටෙලිය පුරාවට පෙම්වතී එම දුරකතනයකින්ම SMS කොටයි.
අනුග්‍රාහකයා දුරකතන ජාල පහසුකම් සපයන්නෙකු නම් ටෙලිය අවසන් පෙම්වතී ජාල සම්බන්ධය සමග ඉගිල යයි.

සිරස ටී.වී. හි "සිහින පුරය" සහ ජාතික රූපවාහිනියෙහි බොහොමයක් කතා අච්චුව ඒකාකාර වුවද අන්තර්ගතයේ එක්තරා නවමු බවක් සහ පණිවිඩයක් ඇත. එය හොඳ සළකුණකි. නමුදු සිරස ටී.වී. හි අනෙකුත් ටෙලි කතා ඇතුළුව ටී.වී. දෙරණ, ස්වාධීන රූපවාහිනී සහ, ස්වර්ණවාහිනී මෙගා ටෙලිකරණය අතින් ළිං පතුලේය. චැනලයන්ගේ අනෙකුත් මාණයන් පිලිබඳ මෙම ලිපියෙහි සංවාදයට බඳුන් නොවන වග කරුණාවෙන් සලකන්න. දූදරුවෝ, කන්දෙ ගෙදර, අන්දර වැට, ඉංගම්මාරුවහි තේමාවන් සහ අනෙකුත් සියළු ගුණාංගයන් සමග සසඳන කල නූතන ටෙලි නාට්‍යකරණය අතිශය පහල බැස ඇත. එම පහල බැස්ම උදෙක් මෙගාව නිසා සිදුවූවක් ලෙස ඇතමුන් චෝදනා කලද , එය එසේ යැයි නිශ්චිත නැත. නමුත් ඉහලින් දැක්වූ උදාහරණ සහ සසඳන කල එය එසේ නොවන්නටද බැරි නැත.

එය එසේ වනවා නම් එය ප්‍රතික්ෂේප නොවන්නේ ඇයි දැයි ගැටළු සහ සැක උපදී. දැන් ටෙලි නාට්‍ය යනු ඇඩ්වටයිසින්ම පමණක්ම වන සෙයක් හැඟෙන අතර, එයට හඬ නගන්නට සිටි මහේන්ද්‍ර පෙරේරලා වැනි අතලොස්සක්ද සැඟවී ඇත. එය මර්ධනය කිරීමකට ලක්ව ඇත්දැ‍යි තවත් නිශ්චිත නැති මුත් මහේන්ද්‍ර පෙරේරා මෙගා ටෙලියක මා තව දැක නැත. දැන් මෙගා නොවන ටෙලියකුත් සොයා ගැනීමට නැත. මීඩියා හී අවශ්‍යතාවයට අනුග්‍රාහකයන්ට මුදලට විකුණා අපට නොමිලේ දෙන විකිණීමේ න්‍යාය ප්‍රතික්ෂේප නොවන්නේ ප්‍රේක්ෂකයන් වන අප දෙන දේ බලා පැයක් පහු වී වේලක් කා නිදයන නිසාද? ඒ වෙනුවෙන් හඬ නැගිය යුතු කළා කරුවන් වැල යන අතට උරිස් ශක්තිය දෙන නිසාද? මේ අප සිදුකරන වැරැද්දක්ද? අප ඉදිරියේ සිදුවෙමින් පවතින වැරැද්දක්ද? අප යොදා සිදු කරවන වැරැද්දක්ද? විමසිය යුතුමය.

බ්ලොග්කරණය කලාවක්ද?

A guilty conscience needs to confess. A work of art is a confession.

෴ Albert Camus ෴

ලියුම්කරුට අනුව නම් කලාව යන්න අර්ථදක්වාලිය හැක්කේ කිසියම් රසවින්දනාත්මක මෙහෙවරක් ඔස්සේ රසවින්දනාත්මක කර්තව්‍යයක් ඔස්සේය. පුවත්පත් කලාවේදියෙකු, ගත්කතුවරයෙකුගේ කාර්යභාරය කුමක්ද ඒ හා සමගාමීව බ්ලොග්කරුවන්ට නියමිත සමාජීය වගකීමක් සහ රසවින්දනාත්මක කෘත්‍යයක් ආරෝපනය වේ. එය එසේ ආරෝපනය වන්නේ කෙසේද යන්න මෙම ලිපියේ සෙසු අන්තර්ගතය ඇසුරින් පහදාදීම ලියුම්කරුගේ අරමුණයි...
මාෂල් මැක්ලුහන්ගේ විශ්ව ගම්මාන සංකල්පයත් සමග අන්තර්ජාලය පෘථිවිය තුල ජනප්‍රිය වනුයේ එහි අදාල සංකල්පය බල ගැන්වීමෙහිලා තිබිය යුතු මූලික ලක්ෂණ බොහොමයකින් සමන්විත වූ නිසා බව ලියුම්කරුගේ අදහසයි. මෙහිලා සාමාජීය ජාල(social networks) සහ ඊමේල් වැඩි කාර්යභාරයක් ඉටු කල බව සඳහන් කල යුතුය. මේ ඇසුරින් විවිධ ජාතීන් ආගම් අතර සම්බන්ධතා පුළුල් වූ අතර එය පෙර තිබු සම්බන්ධතා වලට වඩා වෙනස් ස්වරූපයක් ගති. මේ හා සමග කුඩා කල අපට තැපෑලෙන් ලියුම් එවූ ඇමරිකාවේ හෝ ජපානයේ පෑනේ මිතුරා අපෙන් ඈත්වී ඔන්ලයින් මිතුරෙකු බිහිවීම සිදුවිය.
අන්තර්ජාලය තුල දවසේ පැය විසිහතරෙන් වැඩි කාලයක් ජීවත් වන e - පුරවැසියන් උදෙසා අන්තර්ජාලය තුල දිනපොතක් ලෙස තබාගැනීම අරමුණු කරගෙන නිර්මාණය වන weblog නමින් සිය දෛනික කටයුතු ලේඛනගත කිරීමේ පහසුව සඳහා සයිබර් දිනපොතක් ලෙස බ්ලොග් ආරම්භය ලෙස සනිටුහන් වේ..
මෙවන් සන්දර්භයක් තුල සිය දිනපොත් සිය පෞද්ගලික දිනපොත සියළුම දෙනාට කියවිය හැකිවන පරිදි වෙනස්කල හැකිවීමත් සමග බ්ලොග් අඩවි දිනපොත් ආකෘතියෙන් බැහැරව එයට ජර්නල් ස්වරූපයක් ආරෝපනය වන්නේ එහි ඇති ලේඛන ප්‍රසිද්ධියට පත්වීමත් සමග එහි නිර්මාණාත්මක ස්වරූපය පුද්ගලික දිනසටහනකට වඩා වැඩි වීම නිසාය. මෙවැනි සන්දර්භයක් තුල බ්ලොග් අඩවි එක්තරා එක් ආකෘතියක් ඔස්සේ දිගටම නිර්මාණය වන්නට විය. බ්ලොග් අඩවිට ප්‍රසිද්ධ කිරීම හා සමගාමීව එයටම අනන්‍ය වූ රසිකයින් පිරිසක් එනම් කියවන්නන් පිරිසක් ඇතිවීම ස්වාභාවිකය. ඉන්පසු ස්වකීය රසිකයින් පාදක කරගනිමින් ලේඛනයේ යෙදීම බ්ලොග් කැටගරි වීමට මූලික හේතුව ලෙස සඳහන් කිරීම නිවැරදිය.දැනට ප්‍රචලිත කැටගරි ලෙස පුවත්, දේශපාලනික, කලා, තාක්ෂණික දැක්විය හැක..
සිය බ්ලොග් අඩවියට රසික සමූහයක් ඇතිවීමත් සමග සිය නිර්මාණ කෙරෙහි වගකීමක් ඇති විශ්වාසනීය සටහන් යෙදීමට රචකයා බැඳී සිටියි. මෙය ග්‍රන්ථ කතුවරයෙකු හෝ පුවත්පත් කලාවේදියෙකු ඉදිරිපත් කරන ලේඛනයකට සමාන වගකීමක් ලෙස මම දකිමි.නමුත් පුවත්පත් කලාවේදියෙකුට හෝ නිර්මාණකරුවෙකුට හෝ නොලැබෙන අවස්ථාවක් මෙහිදී නිතැතින්ම බ්ලොග්කරුවාට හිමිවේ. එනම් පාඨක අදහස් ග්‍රහනය කරගැනීමේ අවස්ථාවයි. මෙහිදී අදාල පුද්ගල චරිතයෙන් හෝ නිර්නාමික අදහස් දැක්වීමටද හැකියාවක් ඇත. එනිසා විවේචන සඳහාද විවෘත තත්වයක් හිමිවී ඇත..
බ්ලොග් රචනය යනු කලාවකි. මේ සටහන හුදෙක් බ්ලොග් රචනය පිලිඹඳ ලියැවුන කෙටි ලියවිල්ලක් වන අතර මෙහි අදහස් ලියුම්කරුගේ පෞද්ගලික අදහස් වේ. බ්ලොග් අඩවියකට පුවත්පතකට හෝ ග්‍රන්ථයකට මෙන් රජයේ රෙගුලාසි වලට යටත්ව ලියාපදිංචියක් නැත. රචකයා කවුද යන්න දැනගැනීමේ හැකියාවද ඉතාමත් අල්පය. එනිසා බ්ලොග්කරණය සිදුවන්නේ විවෘත නිදහස් අදහස් ප්‍රකාශනය සිදුවන මාධ්‍යයක් ඔස්සේය. එනිසා එහි ඇති ස්වයං වගකීමද විශ්වාසයද වැඩිවිය යුතුය...